#Change_Makers

കോനിക്കര നേതാജി വായനശാലയിൽ പുതിയതായി ആരംഭിച്ച
#Change_Makers എന്ന പ്ലാറ്റ് ഫോം ഇതിനോടകം ഏറെ ശ്രദ്ധിക്കപ്പെട്ടു.
ഇന്നലെ മലയാള മനോരമ പത്രത്തിൽ വാർത്തയും കൂടി വന്നതോടെ
#Change_Makers നെക്കുറിച്ച്‌ അതിന്റെ പ്രവർത്തനങ്ങളെ കുറിച്ച്;
പ്രത്യേകിച്ച് ഗ്രാമത്തിന്റെ WaterMaping, ജലവഴികളുടെ പഠനം...
ഒക്കെ  കൂടുതലറിയാൻ സുഹൃത്തുക്കൾ പലരും വിളിക്കുകയുണ്ടായി.
അതുകൊണ്ടാണ് ഈയൊരു ബ്ലോഗ് പോസ്റ്റ് ചെയ്യാൻ കാരണം.

 Malayala Manorama Daily, Thrissur Edition, Metro Page 3

ചിന്ത എന്ന ഈ ബ്ലോഗിലും വായനശാലയുടെ ബ്ലോഗിലും
ഞാൻ അപ്ഡേറ്റ് ചെയ്യുന്ന വിവരങ്ങളുടെ ഒരു LOG BOOK ആയി
ഇതിനെ കാണാം. ഇതുവരെ നടത്തിയതും നടക്കുന്നതുമായ
പ്രവർത്തനങ്ങൾ ഇവിടെ പോസ്റ്റാം, ലിങ്കുകൾ പങ്കു വയ്ക്കാം...

നിങ്ങളുടെ വിലയേറിയ അഭിപ്രായങ്ങൾ താഴെ Comments ആയി പ്രതീക്ഷിക്കുന്നു. #Change_Makers ന്റെ വിവിധ വിഷയങ്ങൾക്ക് നിങ്ങൾക്ക് നൽകാവുന്ന നിർദേശങ്ങളും, ആശയങ്ങളും, പ്രകൃതി പരിസ്ഥിതി സംരക്ഷണ- മാലിന്യ സംസ്കരണ രീതികളും...എല്ലാം
ഇവിടെ കൂട്ടുകാർക്കു കമന്റ് ആയി ഇടാം. അവയിലെ നല്ല ആശയങ്ങൾ #Change_Makers ന്റെ News Letter ൽ കൊടുക്കാം, അവയെല്ലാം ഇത് circulate ചെയുന്ന ഇടങ്ങളിൽ വായിക്കാൻ ഇടവരട്ടെ.

#Change_Makers ന് എല്ലാവിധ പിന്തുണയും പ്രതീക്ഷിക്കുന്നു.
ആദ്യം  ഈ ലിങ്കുകൾ വായിക്കാം :

2019 AUGUST 4 @ 4PM

#Change_Makers PART1 : GROOMING

2019 SEPTEMBER 1 @ 10:30 AM

പഠിക്കാം; ഒരു ഗ്രാമത്തിന്റെ ജലരേഖ

2019 SEPTEMBER 13 @ 10:30 AM

#Change_Makers BLOOD DONORS DIRECTORY

2019 SEPTEMBER 16 @ 11AM

#Change_Makers PART2 : LAUNCH

കുറച്ചു സമയം മാറ്റി വയ്ക്കാൻ കഴിയുമെങ്കിൽ
ഈ പ്രവർത്തനങ്ങളുടെ കൂടെ ആർക്കു വേണമെങ്കിലും ചേരാം.

എന്നും നന്മകൾ,
സുജിത്ത്
Mobile 9847956600

പഠിക്കാം; ഒരു ഗ്രാമത്തിന്റെ ജലരേഖ

ഇതെന്റെ നാട്ടിലെ യുവ സുഹൃത്തുക്കളുമായി ചേർന്ന്
തുടങ്ങിയ ഒരു കുഞ്ഞു പഠന കാര്യത്തിന്റെ വിശേഷമാണ്. 

രണ്ടു പ്രളയങ്ങൾ തൊട്ടടുത്ത വർഷങ്ങളിൽ നമ്മളെ കടന്നു
പോയി. നൂറ്റാണ്ടിന്റെ പ്രളയമെന്ന് ഇനി നമുക്കിതിനെ വിശേഷിപ്പിക്കാനാവില്ല. അതിനാൽ നാമീ ദുരന്തങ്ങളിൽ നിന്നും
ഏറെ പഠിക്കാനുണ്ട്. വർഷാവർഷങ്ങളിൽ ദുരിതാശ്വാസ
ക്യാമ്പ് നടത്താൻ മാത്രമല്ലല്ലോ നാം പഠിക്കേണ്ടത്.

ഈയൊരു ചിന്തയിൽ നിന്നാണ് ഗ്രാമത്തിലെ വായനശാലയിൽ 

ഈയിടെ ഒത്തുചേർന്ന യുവ സുഹൃത്തുക്കളുമായി ഒരു പദ്ധതി 

ആവിഷ്കരിച്ചു ശാസ്ത്രീയമായൊരു പഠനത്തിന് നാന്ദി കുറിക്കാൻ 

തീരുമാനിച്ചത്. ചോദ്യങ്ങൾ ചോദിച്ചു പഠിക്കാൻ ആഗ്രഹമുള്ള 

ഏതൊരാൾക്കും നമ്മുടെ കൂടെ കൂടാവുന്നതാണ്. 

ചെയ്യാനുദ്ദേശിക്കുന്നതിനെ ചുരുങ്ങിയ വാക്കുകളിൽ ഇങ്ങനെ അടയാളപ്പെടുത്താം...

1. കോനിക്കര ഗ്രാമത്തിന്റെ ഒരു മാപ്പ് തയ്യാറാക്കുക.

2. തൃക്കൂർ പുഴ മുതൽ ഗ്രാമത്തിലെ ജല സ്രോതസ്സുകൾ രേഖപ്പെടുത്തുക.

3. എല്ലാ ജലസംഭരണികളും കണക്കാക്കി രേഖപ്പെടുത്തുക.

നമുക്ക് നമ്മുടെ നാടിന്റെ നീരൊഴുക്കും ജലശേഖരണ മേഖലകളും വെള്ളത്തിന്റെ കൈവഴികളും മനസ്സിലാക്കാം.

സത്യം പറഞ്ഞാൽ നമ്മുടെ കുഞ്ഞുഗ്രാമത്തിന്റെ ജലരേഖകൾ വരച്ചുണ്ടാക്കാൻ നമുക്കേ കഴിയൂ.

4. നാട്ടിലെ തണ്ണീർ തടങ്ങളും, കുളങ്ങളും, കനാലുകളും, പൊതു കിണറുകളും രേഖപ്പെടുത്തി അവയുടെ മൊത്തം സ്റ്റോറേജ് കപ്പാസിറ്റി / സംഭരണശേഷി കണക്കാക്കുക.

5. ഗ്രാമത്തിന്റെ ജലവിതാനം മനസ്സിലാക്കുക.

വർഷക്കാലത്ത് മഴയുടെ തോതനുസരിച്ചു പെയ്ത്തുവെള്ളം എവിടെയെല്ലാം സംഭരിക്കുമെന്നും, എവിടേക്കൊക്കെ ഒഴുകിപ്പോകുമെന്നും പഠിക്കുക.

6. കഴിഞ്ഞ പ്രളയത്തിലും ഈ പ്രളയത്തിലും എവിടെ വരെ വെള്ളം എത്തി, സൂഷ്മമായ ഒഴുക്കുകൾ എങ്ങോട്ടൊക്കെയാണ്?

7. അവശേഷിക്കുന്ന തണ്ണീർ തടങ്ങൾ ഇല്ലാതായാൽ അത് വേനലിലും മഴക്കാലത്തും എങ്ങനെ ബാധിക്കും.

8. പഠന വിധേയമായ എല്ലാ സൂക്ഷ്മ വശങ്ങളും നിർദ്ദേശങ്ങളും റിപ്പോർട്ട് ആക്കിപ്രസിദ്ധീകരിക്കും.വായനശാലയിൽ അത് വരും തലമുറയ്ക്ക് വെളിച്ചമേകട്ടെ. അതിന്റെ കോപ്പി ബന്ധപ്പെട്ടവർക്ക് കൈമാറാവുന്നതാണ്.

എല്ലാവരുടെയും കയ്യിൽ ഇപ്പോൾ സ്മാർട്ട് ഫോണും ഇന്‍റര്‍നെറ്റും ഉണ്ട്. പഠിക്കാൻ തീരുമാനിച്ച് പത്ത് പേർ ഒരുമിച്ചിറങ്ങണം, അത്രേയുള്ളൂ. 

മാധവ് ഗാഡ്‌ഗിൽ കമ്മീഷൻ പ്രസിദ്ധീകരിച്ച "പശ്ചിമഘട്ട സംരക്ഷണ റിപ്പോർട്ട്" ഞങ്ങൾ വായിച്ചു തുടങ്ങി, ഒരു ശാസ്ത്രീയ സമീപനം എങ്ങനെ നമ്മുടെ പഠനത്തിൽ കൊണ്ടുവരാം എന്ന് അതിൽ നിന്നും മനസ്സിലാക്കാനായി.

CHANGE MAKERS

http://netaji-vayanasala.blogspot.com/2019/07/changemakers.html

പരിസ്ഥിതിയെയും പ്രകൃതിയെയും സംബന്ധിക്കുന്ന
വിഷയങ്ങളിൽ വായനശാലയുടെ വോളണ്ടിയർമാരായി
ചേർന്ന ഒരുപറ്റം യുവ സുഹൃത്തുക്കളാണ് ഈ CHANGE MAKERS.
നമ്മുടെ ആശയം പങ്കു വച്ചപ്പോൾ  മുകളിലെ ChangeMakers നെ
കൂടാതെ കുറച്ചു കൂടി യുവാക്കൾ സ്വയം സന്നദ്ധരായി ഈ
പഠന പ്രക്രിയയിൽ ചേർന്നിട്ടുണ്ട്. 

മലയാള മനോരമയിലെ സീനയും ജെയിംസ് കുട്ടിയും
കട്ടസപ്പോർട്ട് തരും. കിരൺ കണ്ണന്റെ asianetnews ഓൺലൈനിൽ
വന്നൊരു ലേഖനവും എന്റെ ചിന്തകൾക്ക് ആക്കം കൂട്ടി.
അതിലെ എന്നെ തൊട്ട ചിലത് ചുവടെ ചേർക്കുന്നു.

തിരഞ്ഞാൽ കണ്ടെത്താനാകാതെ ഉത്തരങ്ങളില്ല.
ഉത്തരങ്ങൾക്ക് വേണ്ടി അസ്വസ്ഥമാകുന്ന അന്വേഷണ മനസ്
നമ്മുടെ കുട്ടികളിലേക്ക് പകരുക. ആ അന്വേഷണത്തിന്റെ
ചരിത്രമാണ് മാനവികത...

പഞ്ചായത്തിന്റെ ഫ്ലഡ് മാപ്പും വെള്ളത്തിന്റെ വഴികളും
വരയ്ക്കാൻ നമ്മുടെ യുവതയ്ക്ക് കഴിയണം. ഇതുവായിക്കുന്ന
നിങ്ങളിൽ എത്രപേർക്ക് ഗ്രാമത്തിന്റെ പഞ്ചായത്തിന്റെ ചിത്രം
വരയ്ക്കാൻ പറ്റും? പൊളിറ്റിക്കൽ മാപ്പ് പോലെ തന്നെ
പ്രധാനമാണ് ടെറൈൻ മാപ്പും, രണ്ടും പഠിക്കണം.

ബൂത്ത് തിരിച്ചുള്ള പൊളിറ്റിക്കൽ വോട്ടുകളുടെ ജെന്‍ഡറും
മതവും ജാതിയും തിരിച്ചുള്ള എണ്ണം പോലും കൃത്യമായി അറിയാവുന്നവരാണ് നമ്മുടെ നാട്ടിലെ ചെറുപ്പക്കാർ.
ഓരോ കുടുംബത്തിലും നമ്മുടെ പാർട്ടിക്ക് എത്ര വോട്ടുണ്ട്
എന്നറിയാം. തിരഞ്ഞെടുപ്പിൽ തോറ്റാലോ ജയിച്ചാലോ 

എന്തുകൊണ്ട്? എന്തുകൊണ്ട്? എന്തുകൊണ്ട്? എന്ന് ചിന്തിക്കുന്ന
അതേ ആകാംഷയും അനേഷണബുദ്ധിയും നാടിനെ കുറിച്ചുള്ള
മറ്റുള്ള അന്വേഷണങ്ങളിലും നമുക്ക് പുലർത്താനാവണം.

മണ്ണിടിച്ചിലും മഴയും അങ്ങനെയല്ല, നമുക്ക് പഠിച്ചെടുക്കാൻ
ഇത്തിരികൂടി പ്രയാസമാണ്.
പക്ഷേ സ്വതന്ത്ര ശാസ്ത്ര ചിന്താ സംസ്കാരമുള്ള കുഞ്ഞുങ്ങളാണ്
വളരുമ്പോൾ മഴയും മണ്ണിടിച്ചിലും കടലൊഴുക്കും കാറ്റുമെല്ലാം
പ്രവചിക്കാൻ പ്രാപ്തരായ ഗവേഷകരായി വളരുന്നത്.

ഈ പ്രളയത്തിന് ശേഷം "മാപ്പ് തരൂ ഭൂമീ" എന്ന ടോണിൽ മൂന്ന് കവിതകളെങ്കിലും വാട്ട്‌സ് ആപ്പിൽ ലഭിച്ചു! വിലപിച്ചതു കൊണ്ട് 

ഒന്നും നേടാനില്ല, ഒന്നിച്ചു പഠിക്കാം നമുക്ക്.

മഴപ്രദേശത്തെ മാമലകളിൽ എല്ലാകാലത്തും ഉരുൾപൊട്ടൽ
ഉണ്ടാകാറുണ്ട്. താരതമ്യേന ഏകവിള തോട്ടങ്ങളില്ലാത്ത
വിശ്വാസപരമായ കാരണങ്ങളാൽ മനുഷ്യന്റെ ഇടപെടലുകൾ
ഒട്ടുമേ ഉണ്ടാവാതെ കാത്തുസൂക്ഷിക്കുന്ന അസ്പർശിത കാടുകൾ ധാരാളമുള്ള മേഘാലയയിലും, നാഗാലാന്‍റിലുമെല്ലാം
അതിഭീകരമായ മലയിടിച്ചിൽ സാധാരണയാണ്.

മഴയും കാറ്റുമുള്ള ഭൂമിയിൽ മലകളുടെ ശോഷണവും
ആഴങ്ങളിൽ മണ്ണ് വീണ് തൂർന്നുപോകലുകളുടെയും
നൈരന്തര്യം സംഭവിച്ചുകൊണ്ടിരിക്കുക തന്നെ ചെയ്യും.
പശ്ചിമഘട്ടം പേലവമായ ഒരു ജൈവ വനമേഖലയാണ്...
അവിടുത്തെ ജൈവലോകത്തിനെ വല്ലാതെ
ആലോസരപ്പെടുത്തതിരിക്കാൻ നമുക്ക് എന്തു ചെയ്യാൻ കഴിയും?

കാടിനോടും മലകളോടും ജലാശയങ്ങളോടും എങ്ങനെയാണ്
നമ്മൾ ഇടപെടേണ്ടത് എന്ന കാര്യത്തിൽ
ഒറ്റവാക്കുത്തരങ്ങളൊന്നും എന്റെ കയ്യിലില്ല. 

ഭൂമിയിൽ നമ്മൾ സുരക്ഷിതരായിരിക്കാൻ നമ്മൾ
തന്നെ കരുതലെടുക്കണം.

വേരാഴമുള്ള മരങ്ങൾ ഒരു പരിധിവരെയൊക്കെ
ഉരുൾപൊട്ടൽ തടയും. പ്രകൃതിയെയും പരിസ്ഥിതിയെയും
ഉപദ്രവിക്കാതെ ജീവിക്കുക.

പഠിക്കാം നമ്മുടെ ഗ്രാമത്തിനെ...

ചോദ്യം ചോദിച്ച് പഠിച്ച് ഉത്തരം കണ്ടെത്തിയതൊന്നും നമ്മൾ മറക്കില്ല... 

ഈ എളിയ പഠന സംരംഭവവും, കാലം നമ്മുടെ ഗ്രാമത്തിന്റെ 

ചരിത്രവഴികളിൽ അടയാളപ്പെടുത്തട്ടെ...

പുനർജനി @ നിലമ്പൂർ

2018 ലെ പ്രളയശേഷം മഴക്കൂട്ടത്തിന്റെ ആഭിമുഖ്യത്തിൽ
പുനർജനി എന്ന പേരിൽ FLOOD RELIEF ACTIVITIES നടത്തിയിരുന്നു.
ഈ വർഷവും  2019 ലെ പ്രളയാനന്തരം നിലമ്പൂർ ഭാഗത്ത്
മഴക്കൂട്ടം അതിജീവനത്തിന്റെ ഒരു കുഞ്ഞു കൈത്താങ്ങായി.

2019 ആഗസ്ത് 17 ന് പ്രവർത്തകർ പ്രളയ ബാധിത പ്രദേശങ്ങൾ
അവിടെ പോയി സന്ദർശിക്കുകയും, data collection നടത്തുകയും
ചെയ്തതിന്റെ അടിസ്ഥാനത്തിൽ മലപ്പുറം മമ്പാട് പഞ്ചായത്തിലെ
ഗവ. LP  സ്‌കൂളിലെ കുട്ടികൾക്ക്
ബാഗ്, കുട, പുസ്തകങ്ങൾ, വെള്ളക്കുപ്പി, പെന, പെൻസിൽ, ക്രയോൺ,
കട്ടർ, റബ്ബർ എന്നിവയടങ്ങുന്ന കിറ്റുകൾ വിതരണം ചെയ്യുകയും ചെയ്തു.

2019 ആഗസ്ത് 23
ആവശ്യമായ സാധനങ്ങൾ വാങ്ങി, 66 കുട്ടികൾക്കുള്ള സ്‌കൂൾ കിറ്റുകൾ തയ്യാറാക്കി.

2019 ആഗസ്ത് 24 രാവിലെ 6 മണിക്ക് നിലമ്പൂരിലേക്ക് പുറപ്പെട്ടു.
1. മേപ്പാടം LP സ്‌കൂൾ (21)
2. വടപുറം LP സ്‌കൂൾ (35)
3. നടുവക്കാട് LP സ്‌കൂൾ (10)
4. വീട്ടിക്കുത്ത് LP സ്‌കൂൾ (Bags Only)

ഒരു പത്തു പത്തരയോടെ  എല്ലാ സ്കൂളുകളിലുമെത്തി
അവിടെ നമ്മൾ മുന്നേ വിളിച്ച് എല്ലാം സെറ്റ് ആക്കി വച്ചിരുന്ന
അവിടുത്തെ പ്രധാന അദ്ധ്യാപകരുടെ കൈകളിൽ ആവശ്യമുള്ള
സ്കൂൾ കിറ്റുകൾ ഏൽപ്പിച്ചു. സ്കൂളുകളിലേയ്ക്ക് പോകുന്നതിന് സഹായത്തിനായി അവർ അസ്‌കർ സാറിനെ ഏർപ്പാടു ചെയ്തിരുന്നു... അതുകൊണ്ടു തന്നെ സ്കൂളുകളിലേയ്ക്ക് എത്തിപ്പെടാനുള്ള ബുദ്ധിമുട്ട് ഒഴിവായിക്കിട്ടി...

വടപുറം LP സ്‌കൂൾ

ശരിക്കും ഒരു വ്യത്യസ്തമായ ഒരനുഭവം തന്നെയായിരുന്നു എല്ലാവർക്കും... നമ്മൾ ആ കിറ്റുകൾ കൊണ്ടു ചെല്ലുമ്പോൾ അവിടുത്തെ അദ്ധ്യാപകരുടെ സ്വീകരണവും പെരുമാറ്റവും  ആ കുട്ടികളുടെ മുഖത്തുണ്ടാകുന്ന സന്തോഷവും പുഞ്ചിരിയും അവരുടെ സ്നേഹവും പറഞ്ഞറിയിക്കാൻ പറ്റില്ല...

(നടുവക്കാട് LP സ്‌കൂൾ)

കേരള സാഹിത്യ അക്കാദമി പ്രസിദ്ധീകരിച്ച "പ്രളയാക്ഷരങ്ങൾ" എന്ന പുസ്തകം അവിടുത്തെ സ്കൂൾ ലൈബ്രറിയിലേക്ക് സംഭാവന ചെയ്തു. നമ്മുടെ സന്ദർശനത്തിന്റെ ഒരു അടയാളം ആ പുസ്തക റാക്കുകളിൽ മായാതെ കിടക്കട്ടെ...

മേപ്പാടം LP സ്‌കൂൾ

 മുനീർ മാഷും മുരളി മാഷും ടോമി സാറും ജൗഷിറ ടീച്ചറും
ഷേർളി ടീച്ചറും അസ്‌കർ സാറും പിന്നെ അന്നാട്ടിലെ കുറേ
ആളുകളും സ്നേഹം അറിയിച്ചിട്ടുണ്ട്.
കൂടെ ഉണ്ടായിരുന്നില്ല ഇല്ലെങ്കിലും, ദൂരെയുള്ള ഈ യാത്രയിൽ  മനസ്സുകൊണ്ട് അനുഗമിച്ച ഏവർക്കും ആ സ്നേഹത്തിന്റെ
ഒരു പങ്ക് ഇവിടെ വയ്ക്കുന്നു, എടുത്തു കൊള്ളുക...

തിങ്കളാഴ്ച നമ്മൾ നൽകിയ പുസ്തകവും ബാഗും കുടയും ഒക്കെയായി
ഈ കുരുന്നുകൾ സ്കൂളിൽ വരുമ്പോൾ അവരുടെ മുഖത്തെ
പുതു പ്രതീക്ഷയിൽ നമുക്കോരോരുത്തർക്കും ഒരു കുഞ്ഞു പങ്കുണ്ട് എന്നറിയുക, സന്തോഷിക്കുക...

മനസ്സു നിറഞ്ഞു കൊണ്ട് മടങ്ങിയെത്തുമ്പോൾ എല്ലാവരോടും നന്ദി മാത്രം... സഹായിച്ചവർക്ക് കൈ നീട്ടാതെ തന്നെ മുന്നോട്ട് വന്നവർക്ക് കണ്ടിട്ടും കാണാതെ പോയവർക്ക് ആഗ്രഹമുണ്ടായിട്ടും സഹായിക്കാൻ പറ്റാതെ പോയവർക്ക് ഇതിനോടകം തന്നെ അവരെ സഹായിച്ചവർക്ക് എല്ലാവരോടും നന്ദി മാത്രം...

ഈ അദ്ധ്യാപകരും, തഹസിൽദാറും, താലൂക് കോർഡിനേറ്റർ മാരുമാണ് ഈ സ്കൂൾ കിറ്റ് വിതരണം കോർഡിനേറ്റ് ചെയുന്നത്. ഇതുവരെ മമ്പാട് അടക്കം 6 പഞ്ചായത്തുകളിൽ 3000+ കിറ്റുകൾ നമ്മളെ പോലെയുള്ള സംഘടനകൾ വഴി എത്തിക്കാൻ ആയി.
സുരാജു ചിപ്പനും ഷഹീറും കണ്ണൻ ചേട്ടനും കൂടെ യാത്രയിൽ ഉണ്ടായിരുന്നു.

My Sessions as Resource Person

The Project Architecture and Design
V - SAFE
Safety Alert for Flood Emergency.
CS Department for Yoing Innovators Project by Govt. of Kerala

Automated Flood detection and communication system for villeges using Water Sensors, IoT(Internet of Things) and Android Apps.

-------------------------------------------------------------------------------
Industry Person for Board of Studies (BOS)
St. Joseph's College, Irinjalakuda
(Autonomous)
Date: 2019 Nov 29

-------------------------------------------------------------------------------
Zelesta Zest 2.0
Inter Collegiate Tech Fest
Chief Guest for closing ceremony.
St. Joseph's College, Irinjalakuda
Date: 2019 Nov 22

-------------------------------------------------------------------------------
GANDHI SMRITHY FOR 150TH ANNIVERSARY CELEBRATION OF GANDHIJI
SANTHI NAGAR LIBRARY
Marathakkara

-------------------------------------------------------------------------------
Bridge The Gap with IT Industry
Vimala College, Thrissur
Date: 2019 August 31

-------------------------------------------------------------------------------
Inauguration
Computer Science Department
Little Flower College, Guruvayoor
Date: 2018 August 10

-------------------------------------------------------------------------------
Technical Session
National Seminar
Prajyoti Niketan College, Pudukad
Date:
-------------------------------------------------------------------------------
Inauguration
Computer Science Department
Prajyoti Niketan College, Pudukad
Date: 2006
-------------------------------------------------------------------------------

അമ്മ

- From Room#240 (ദയ ഹോസ്പിറ്റൽ , തൃശൂർ)

2019 മാർച്ച്‌ 9

പത്തു പന്ത്രണ്ടു ദിവസത്തെ വിരസവും ദുഷ്കരവുമായ ആശുപത്രി വാസം അമ്മയുടെ രൂപം തന്നെ ആകെ മാറ്റിയിരുന്നു. വേറെ ആരെയോ പോലെ തോന്നി എനിക്ക്. കുളിക്കാതെ, എണീക്കാതെ, മറിഞ്ഞു പോലും കിടക്കാനാവാതെ ബെഡിൽ ഒറ്റക്കിടപ്പ്; ശരീരത്തിന്റെ അകത്തേക്കും പുറത്തേക്കും എപ്പോഴോ എന്തൊക്കെയോ പോകുന്നത് എന്നൊന്നും അറിയാതെ, എന്നാൽ തെളിഞ്ഞ ബോധത്തോടെ വേദനിച്ചു കിടക്കുന്ന അവസ്ഥ ഇത്തിരി കഷ്ട്ടം തന്നെയാണ്. 

ഇന്നലെ അമ്മേടെ മുഖം തന്നെ ആകെ മാറിയ പോലെ, മുടിയൊക്കെ കെട്ടു പിണഞ്ഞു ജടപിടിച്ചു. വേറൊരാളെ പോലെ. ഉച്ചക്ക് സന്ദർശകർ ഇല്ലാത്ത നേരം, ചീർപ്പെടുത്തു പതിയെ ഞാനെന്റെ അമ്മേടെ മുടി ചീകിയൊതുക്കാൻ ശ്രമിച്ചു. 

അനേകം കിമോകൾ കഴിഞ്ഞു ബാക്കിവച്ച ഇത്തിരി മുടിയായിട്ടും, 

വിരലിനാൽ പോലും ഇഴ  തൂർക്കാൻ വയ്യാത്ത വണ്ണം കെട്ടു പിണഞ്ഞത് കണ്ടപ്പോൾ സങ്കടം തോന്നി. അമ്മേടെ കല്യാണം കഴിഞ്ഞു വരുമ്പോൾ ഇവിടുള്ളോർ പറയാരുന്നു ത്രേ, അംബുജത്തിന് എന്തോരം മുടിയാണെന്ന്. പഴയ ഫോട്ടോകളിൽ ഞാനും കണ്ടിട്ടുണ്ട്, നീണ്ട മുടിയുള്ള സുന്ദരിയായ എന്റെ അമ്മ. ആ ഓർമ്മകളിലെ മുടിയൊക്കെ എത്ര പെട്ടെന്നാണ് ഈ അസുഖം കവർന്നെടുത്തത്. 

ഒരറ്റത്ത് നിന്നും ഇഴകളായി ഞാൻ അമ്മേടെ തലമുടി,കെട്ടുകൾ മാറ്റി മാറ്റി ഇഴതീർത്തു. കുറേശ്ശെ പൊട്ടി പോകുന്നുണ്ടായിരുന്നു. എന്നാലും ചായ കുടിക്കും നേരമാവുമ്പോഴേക്ക്, കെട്ടിയൊതുക്കാവുന്ന തരത്തിൽ വെള്ളക്കരയോട് കൂടിയ കറുത്ത മുടികൾ ഒതുക്കി വച്ചു. അപ്പോൾ അമ്മയ്ക്ക് ഒരാഗ്രഹം, എടാ നീയൊന്നു മുടി മെടഞ്ഞിട്ടു തരുമോ. പിന്നെന്താ, നാലഞ്ചു വിരൽ കനമേ ഉള്ളുവെങ്കിലും ആ മുടി മെടഞ്ഞിട്ടു റബ്ബർ ബാന്റിട്ടു  കൊടുത്തപ്പോൾ അമ്മേടെ മുഖത്തൊരു ചിരി വിടർന്നു. ഈയിടെയായി വല്ലപ്പോഴും മാത്രം അമ്മേടെ മുഖത്ത് കാണാറുള്ള പോലെയൊരു ചിരി.

ചുണ്ടിലാ ചിരിയോടെ  അമ്മ അപ്പോഴേക്കും ചെറിയൊരു മയക്കത്തിലേക്ക് നാണിച്ചൊളിച്ചു നിന്നു. 

---------------------------------------------------------------------------------------------------
രണ്ടു ദിവസം കഴിഞ്ഞു അമ്മ ആശുപത്രി യിൽ നിന്നും വീട്ടിലെത്തി.
2019 മാർച്ച്‌ 15 രാത്രി 11:50 ന് അമ്മ മരിച്ചു.

മഴക്കൂട്ടം & Mithr 2019

www.mithr.in
PREFACE:
Please Read the related previous post : Click Here

മഴക്കൂട്ടം വാട്സ് ആപ് ഗ്രൂപ്പും Mithr Foundation നും ചേർന്ന്, കേരളത്തിലെ കോളേജ് ക്യാംപസുകളിൽ നിന്നും ക്ഷണിച്ച സാമൂഹ്യ ക്ഷേമപരമായ  ആശയങ്ങളിൽ നിന്നും Socially Committed Projects തിരഞ്ഞെടുത്തു.

കേരളത്തിലെ 5 ജില്ലകളിൽ നിന്നും വിവിധ കോളേജുകൾ പങ്കെടുത്ത ഈ സംരംഭത്തിൽ അവസാന റൗണ്ടിലെത്തിയ ക്യാമ്പസുകൾ 2019 ജനുവരി 26 ന്, തൃശ്ശൂരിലെത്തി പ്രോജക്ടുകൾ അവതരിപ്പിച്ചു.
മഴക്കൂട്ടത്തിലെ സീന കാപ്പിരി (മാധ്യമ പ്രവർത്തക) പ്രോഗ്രാം കോർഡിനേറ്റ് ചെയ്തു.

EDUCATION & SKILL DEVELOPMENT എന്ന വിഭാഗത്തിൽ
തൃശൂരിലെ ശ്രീ കേരളവർമ കോളേജിന്റെ
"സ്വരവർണ്ണ കാഴ്ചകൾ" (Digital Voice Library For The Blind)
എന്ന പ്രൊജക്റ്റ്  50,000 /- രൂപയുടെ സമ്മാനത്തിന് അർഹരായി.

(ശ്രീ കേരളവർമ കോളേജ് ടീമംഗങ്ങളോടൊപ്പം)

YOUTH & HOLISTIC WELLNESS എന്ന വിഭാഗത്തിൽ
പാലക്കാട് അഷ്ടാംഗം ആയുർവേദ വിദ്യാപീഠം
30000 /- രൂപയുടെ സമ്മാനത്തിന് അർഹരായി.
കുട്ടികളിലെ ആരോഗ്യ പരിശീലനം ആണ് ഇവർ നടപ്പിലാക്കാൻ പോകുന്ന പദ്ധതി.

(അഷ്ടാംഗം ആയുർവേദ വിദ്യാപീഠം ടീമംഗങ്ങളോടൊപ്പം)

അദ്ധ്യാപകരോടൊപ്പം എത്തിയ ക്യാംപസ് വിദ്യാർത്ഥികൾ അവരവരുടെ പ്രോജക്ടിന്റെ പൂർണ്ണമായ ആശയം, എസ്റ്റിമേറ്റ്, ബഡ്ജറ്റ്, നടപ്പിലാക്കാനുള്ള കാലാവധി എന്നിവ വിശദീകരിച്ചു. ഇവാല്യൂവേഷൻ പാനലിന്റെ സംശയങ്ങൾക്കും ചോദ്യങ്ങൾക്കും വ്യക്തമായ ഉത്തരങ്ങളും പ്ലാനുകളും നൽകിയ ക്യാംപസുകളെയാണ്, പ്രൊജക്റ്റ് നടപ്പാക്കുന്നതിനായി തിരഞ്ഞെടുത്തത്.

Evaluation Panel :

Dr. ഇ സന്ധ്യ (എഴുത്തുകാരി , അദ്ധ്യാപിക)

രൺദീപ് നാഥ് (IT പ്രൊഫഷണൽ)

ശ്രീകല ബാലഗോപാൽ (Asst. പ്രൊഫസർ)

ബിനു ഫ്രാൻസിസ് (IT പ്രൊഫഷണൽ)

(SN കോളേജ് ടീമംഗങ്ങളോടൊപ്പം)

ക്യാംപസിലെ വിദ്യാർത്ഥികളെയും അവരോടൊപ്പം മാർഗ്ഗ നിർദേശങ്ങൾ നൽകി കൂടെ നിന്ന എല്ലാ അധ്യാപകരെയും പ്രത്യേകം അഭിനന്ദിക്കുന്നു.

(Principal, Teachers, College Union Members and HEPSN Team, KeralaVarma College)

(Dr. Johnson and BAMS Students, Ashtamgam Ayurveda College, Palakkad)

മഴക്കൂട്ടത്തിലെ സന്ധ്യ ടീച്ചർ സമ്മാനാർഹർക്ക് സർട്ടിഫിക്കറ്റുകൾ വിതരണം ചെയ്തു.
മഴക്കൂട്ടം ഗ്രൂപ് അഡ്മിൻനും Mithr Foundation ന്റെ സ്ഥാപകനുമായ സുജിത്ത്
ഈ സംരംഭത്തിൽ പങ്കെടുത്ത / സഹകരിച്ച എല്ലാവർക്കും നന്ദി രേഖപ്പെടുത്തി.

യഥാർത്ഥത്തിൽ പ്രോജക്ടിന്റെ ഘട്ടങ്ങൾ തുടങ്ങുന്ന മുറയ്ക്ക്
അർഹമായ തുക പ്രൊജക്റ്റ് ടീമിന് നൽകി,
ക്യാമ്പസുകൾ സ്വപ്നം കണ്ട പദ്ധതി ആവിഷ്‌ക്കരിക്കാൻ
മഴക്കൂട്ടവും Mithr Foundation നും ഈ യുവതയോടൊപ്പം എന്നുമുണ്ടാകും.

തിരഞ്ഞെടുത്ത പ്രൊജക്ടുകളെക്കുറിച്ച് എനിക്കേറെ പറയാനുണ്ട്.
വരും മാസങ്ങളിൽ ഈ പ്രൊജക്ടുകൾ യാഥാർഥ്യമാകുമ്പോൾ
വിശദമായി ഇവിടെ എഴുതാം.
ഇന്നിപ്പോൾ ഈ ക്യാമ്പസിന്റെ സ്വപ്‌നങ്ങൾ മഴക്കൂട്ടത്തിന്റെ കൂടി സ്വപ്നമാണ്; അവ യാഥാർഥ്യമായി കാണാൻ ഞങ്ങളും കാത്തിരിക്കുന്നു.

ആശംസകളോടെ...
www.mithr.in

ക്യാമ്പസ് ഉണരുമ്പോൾ

2018 November 22

📝

Dear Campus Friends and Teachers, 

സമൂഹത്തിനു വേണ്ടി ഉപകാരപ്പെടും വിധം എന്തെങ്കിലും ചെയ്യാൻ
ആഗ്രഹിക്കുന്നൊരു കൂട്ടം വിദ്യാർഥികൾ ഉള്ള ക്യാമ്പസ്‌ ആണോ നിങ്ങളുടേത്? നന്മയുള്ള ഒരു project ഏറ്റെടുത്തു ചെയ്യാൻ തയ്യാറുണ്ടോ,
എങ്കിൽ കൂട്ടമായിരുന്നു ചർച്ച ചെയ്തു നിങ്ങൾക്കാവും വിധത്തിൽ
ചെയ്യാവുന്നൊരു ആശയവുമായി വരൂ,
നമുക്കൊന്ന് ശ്രമിച്ചു നോക്കാം.
മഴക്കൂട്ടം എന്ന സൗഹൃദ കൂട്ടായ്മ,
Social Commitment  ഉള്ള projects ക്ഷണിക്കുന്നു. തിരഞ്ഞെടുക്കപ്പെടുന്ന project ന്
ധനസഹായം നൽകി പ്രോത്സാഹിപ്പിക്കുന്നതാണ്.


Be the part of that change you would like to see in this society. Together let's make a difference.

Guidelines

👇

1. Need a detailed Project plan, with the below information:

(a). Project Description

(b). Benefit/Impact - Define the benefit out of the project, or the impact you would like to see

(c). Execution Plan

(d). Timelines - When are you planning to start, how long would it take to implement

(e). Estimated Budget - Total estimate as well as details of individual expenses 

(f). Involvement/Contribution from your team - Fund, man power etc.

(g). Team size - Minimum 10

(h). Project Leads - One Student and One Teacher

2. Estimated budget, excluding the contribution from your end, should not exceed Rs.50,000/-

3. Project cannot have any tie ups with third parties like government, political parties, religious groups or any others NGOs.

4. A brief description of the Project idea is to be submitted, no later than Dec 1st, 2018. 

5. Detailed Project plan, along with a letter from Principal or HOD, need to be submitted on or before Dec 20, 2018. 

6. Ideas will be evaluated by a Selection Panel, and top 3 will be short listed. Weightage will be given to the ones, which are most helpful to the society or campus, and which involves genuine participation from the Project team members.

7. Top 3 teams are to present their ideas and execution plan, in front of the Selection Panel, based on which the final selection will be made.

8. Fund transfer for the selected team, will be made to the college, NSS unit or Department Account. We expect maximum transparency in the fund utilization. 

Our aim, with this activity, is to cultivate social responsibility, organization skills and empathy in our young generation, thereby developing a culture of extending supportive hands to our fellow beings.

Best wishes. 

മഴക്കൂട്ടം WhatsApp Group

&

MITHR Merit Scholarships For Students

www.mithr.in

For enquiries, 

98 47 95 66 00

(Sujith)

നമുക്ക്‌ വരവേൽക്കാം ഈ പുതുവർഷത്തെ, പുതുമയുള്ളൊരു ആശയവുമായി. നവകേരളം നമ്മുടെ നന്മയിലൂടെ... 

ആശംസകൾ
---------------------------------------------------------------------------------------------- മഴക്കൂട്ടം
2019 ജനുവരി 11

സുഹൃത്തേ,

മഴക്കൂട്ടം WhatsApp ഗ്രൂപ് കേരളത്തിലെ ക്യാംപസുകൾക്കായി ഒരുക്കിയ അവസരം വിനിയോഗിച് വിവിധ പ്രൊജെക്ടുകൾ തയ്യാറാക്കി പങ്കെടുത്തഎല്ലാ കോളേജുകളെയും അഭിനന്ദിക്കുന്നു. തിരുവനന്തപുരം, ആലപ്പുഴ, തൃശൂർ, പാലക്കാട്, കാസർകോട് എന്നീ ജില്ലകളിൽ നിന്നും മഴക്കൂട്ടത്തിന്വിവിധങ്ങളായ പ്രൊജക്റ്റ് പ്രൊപ്പോസലുകൾ ലഭിച്ചതിൽ നിന്നും, Evaluation Marks ന്റെ അടിസ്ഥാനത്തിൽ തിരഞ്ഞെടുത്ത, ഏറ്റവും മികച്ച മൂന്നുപ്രൊജെക്ടുകൾ ആണ് അവസാന റൗണ്ടിൽ എത്തിയിരിക്കുന്നത്.


COLLEGES  SELECTED FOR മഴക്കൂട്ടം PROJECTS ARE AS FOLLOWS:-


1) SREE KERALA VARMA COLLEGE, THRISSUR

Title=Digital Voice Library for blind students

2) ASHTAMGAM AYURVEDA COLLEGE, PATTAMBI, PALAKKAD

Title=Knowledge-Attitude-Practice

3) SREE NARAYANA COLLEGE, NATTIKA, THRISSUR

Title=Eco friendly cirque zone

നേരത്തെ അറിയച്ചതിൽ നിന്നും വ്യത്യസ്തമായി ഒരു സന്തോഷവാർത്ത കൂടി അറിയിക്കുന്നു. തിരഞ്ഞെടുക്കപ്പെടുന്ന മികച്ച ഒരു പ്രൊജക്റ്റ് നുള്ള 50,000 /- രൂപയുടെ സമ്മാനത്തിന് പുറമെ 30,000/- രൂപയുടെയും
 10,000/- രൂപയുടെയും രണ്ടു സമ്മാനങ്ങൾ കൂടി ഉണ്ടായിരിക്കും.

ഈ മൂന്നു സ്ഥാനക്കാരെ നിർണ്ണയിക്കാൻ അവസാന റൗണ്ടിൽ എത്തിയ മൂന്നു കോളേജിൽ നിന്നും ടീമുകളെ, നേരിട്ടുള്ള പ്രൊജക്റ്റ് അവതരണത്തിനായി ഞങ്ങൾ ക്ഷണിക്കുകയാണ്.

2019 ജനുവരി 26 രാവിലെ 10 മണിക്ക്.

@ ജ്ഞാനോദയം വായനശാല ഹാൾ, പൂങ്കുന്നം, തൃശൂർ

(പൂങ്കുന്നം ശ്രീരാമകൃഷ്ണ ആശ്രമത്തിനു പിൻവശം, Near Elite SuperMarket )

നിങ്ങൾ സമർപ്പിച്ച പ്രോജക്ടിന്റെ എല്ലാ വിശദാംശങ്ങളുമായി ഞങ്ങളുടെ പാനലുമായി സംവദിക്കണം. അദ്ധ്യാപകരും രണ്ടു വിദ്യാർത്ഥികളും ഉള്ളടീമുകൾ പാനലിന്റെ സംശയങ്ങൾക്കുള്ള ഉത്തരങ്ങൾ നൽകാൻ കഴിയുന്നവരായിരിക്കണം. നേരത്തെ മഴക്കൂട്ടത്തിന് സമർപ്പിച്ച റിപ്പോർട്ടും ഈപ്രസന്റേഷനും കണക്കിലെടുത്താവും വിജയികളെ പ്രഖ്യാപിക്കുക.

എല്ലാവർക്കും വിജയാശംസകൾ നേരുന്നു.

മഴക്കൂട്ടത്തിന്റെ ഈ സംരംഭത്തിൽ ലഭിച്ച എല്ലാ പ്രജക്ടുകളും മികവാർന്നതായിരുന്നു; പങ്കെടുത്ത എല്ലാ കോളേജ് ക്യാംപസുകൾക്കും പ്രത്യേകം നന്ദിഅറിയിക്കുന്നു.

സസ്നേഹം,
മഴക്കൂട്ടം

കൂടുതൽ വിവരങ്ങൾക്ക് മഴക്കൂട്ടം അഡ്മിനുമായി ബന്ധപ്പെടുക
9847956600 (സുജിത്ത്)

--------------------------------------------------------------------------------

GUIDELINES FOR PROJECT PRESENTATION

1) Each team will be having 30 minutes to discuss about your project.

                1.a) 20 minutes to present the project before the evaluation panel.

                1.b) 10 minutes for Q and A session.
           
2) You can present your ideas in any language.(Malayalam or English)

3) Any supporting media viz. Laptops, PPTs, Smart Phones, Photographs, Project Plans, Cost Estimation doc etc. can be used.

4) The team should have to justify the project in terms of implementation, feasibility, sustainability and your participation efforts.

5) Please bring a copy of the authorised bank account details(Acc No, IFSC Code) duly signed by the HOD or the Principal.

6) All teams are requested to reach atleast 10 minutes before the program start at the venue, as we communicated earlier.

Time Slot for Sree KeralaVarma College 10:00 AM to 10:30 AM

Time Slot for SN College 10:30 AM to 11:00 AM

Time Slot for Ashtamgam College 11:00 AM to 11:30 AM

 7) The final results will be declared on the same day.


The decisions taken by the evaluators of Team Mazhakkoottam will be final.

പ്രളയാനന്തരം

Coming Soon : This blog is under construction

കേരള നാടിനെ കടന്നു പോയ ,
നൂറ്റാണ്ടിന്റെ മഹാപ്രളയകാലത്തെ അനുഭവക്കുറിപ്പുകൾ.


TODO:

a) FLOOD RESCUE & EVACUATION ACTIVITIES

b) FLOOD RELIEF ACTIVITIES

c) REHABILITATION ACTIVITIES

d) REBUILD KERALA ACTIVITIES

കോതാട്

ഇതൊരു പടം പിടുത്തം വൈറലായ കഥ. (ഞാനറിയാതെ)

പടം പിടിത്തം എന്നും എന്റെയൊരു ഇഷ്ട്ടമാണ്, ഏറെ വർഷങ്ങളായി.
പോകുന്നിടത്തു കണ്ണിൽ കണ്ട കൗതുകങ്ങളെല്ലാം ക്ലിക്കി അത്
അടുത്ത സുഹൃത്തുക്കൾക്ക് അയച്ചു കൊടുക്കുക പതിവാണ്.
എഴുത്തും വായനയും കാഴ്ചകളും ഇഷ്ട്ടപ്പെടുന്ന "മഴക്കൂട്ടം" എന്നൊരു ഗ്രൂപ്പും ഉണ്ട്.
പക്ഷേ നിനച്ചിരിക്കാതെ, മഴക്കൂട്ടത്തിൽ ഒരിക്കൽ പോസ്റ്റിയ
ചിത്രം വഴിതെറ്റി സോഷ്യൽ മീഡിയകളിൽ പലയിടങ്ങളിൽ കറങ്ങിത്തിരിഞ്ഞ  സംഭവം ആദ്യമാണ്.

കഥയിങ്ങനെ:
നമ്മുടെ ഒരു സുഹൃത്ത് നെവിലിന്റെ മകൻ
കൈനാൻ കുട്ടന്റെ  മാമ്മോദീസ...അന്നവിടെ പോകാൻ
അസൗകര്യം ഉള്ളതിനാൽ, കൃഷ്ണയെയും മക്കളെയും
കൂട്ടി തലേദിവസം പോയി. കൂടെ വിമലും.

എവിടെ? കോതാട് എന്നൊരിടത്ത്. ഒരു ദ്വീപാണത്.
അതെവിടെയാ? എറണാകുളത്തെ Aster Medicity ഹോസ്പിറ്റൽ ഇല്ലേ, അതിന്റെ നേരെ വടക്കും ഭാഗം, ചെറിയൊരു ദ്വീപ്, ഗ്രാമം; കോതാട്.
കടമക്കുടി പഞ്ചായത്തിലെ കണ്ടനാട്, കോരംപാടം എന്നീ പ്രദേശങ്ങൾ ചേർന്നതാണ് കോതാട്.

അവിടെ പോയി കൊച്ചിനെ കണ്ടു കുശലവും പറഞ്ഞു തിരികെ പോരാറായപ്പോൾ നെവിൽ പറഞ്ഞു,
അടുത്ത് തന്നെ ഒരു കടവും പള്ളിയുമുണ്ടെന്ന്.
അത് കേട്ടപ്പോൾ കൃഷ്ണയ്ക്കും അവിടെയൊക്കെയൊന്ന് കാണാൻ പൂതി. ഇരുട്ടുന്നതിനു മുൻപേ വീട് പിടിക്കണമെന്ന് പറഞ്ഞു വിമൽ സ്കൂട്ട് ആയി. പക്ഷേ ആ തീരുമാനം തെറ്റായിപ്പോയെന്ന് പിന്നീടവന് മനസ്സിലായി, നല്ലൊരു കാഴ്ചയാണ് ചെക്കന് നഷ്ടമായത്.

ആ കടവിന്റെ ഓരത്തുള്ള കോതാട്  തിരുഹൃദയ പള്ളിയിലെ
പെരുന്നാളാണ് പിറ്റേ ദിവസം. അവിടുത്തെ പ്രദക്ഷിണ പന്തലിന്റെ അലങ്കാരം മുഴുവൻ പച്ചക്കറികളും ഫല വർഗ്ഗങ്ങളും തൂക്കിയിട്ടു കൊണ്ടാണ്.
വാഴ കുടപ്പനും, ചീരയും, പയറും, വെണ്ടയും, വഴുതനയും,
കാരറ്റും, ബീറ്റ് റൂട്ടും, തക്കാളിയും, അച്ചിങ്ങ, പീച്ചിങ്ങ, മുന്തിരി
തുടങ്ങിയവ വരി തെറ്റാതെ 50 മീറ്റർ നീളത്തിൽ പന്തലിനെ
സുന്ദരമാക്കി തൂങ്ങി കിടക്കുന്ന കാഴ്ച ഒരു കൗതുകം തന്നെയാണ്.
നല്ല ഭംഗിയാ കാണാൻ. ഓരോ പച്ചക്കറിയും ഒരുക്കുന്ന ചുമതല
ഓരോരോ കുടുംബ യൂണിറ്റുകൾക്കാണത്രെ. അതും കൊള്ളാം.
പെരുന്നാൾ ദിവസം കുർബാനക്ക് ശേഷം ഈ പച്ചക്കറികളെല്ലാം പാഴാക്കാതെ വിശ്വാസികൾ ലേലം ചെയ്തു പങ്കിട്ടെടുക്കും.
സമൃദ്ധിയുടെ നല്ല കാഴ്ചകൾ ആയിട്ടാണ് എനിക്ക് തോന്നിയത്.

കൃഷ്ണയെയും മക്കളെയും പന്തലിൽ നിർത്തി ആ കാഴ്ചകൾ എന്റെ മഴക്കൂട്ടുകാർക്ക്, ചെറിയൊരു കുറിപ്പോടെ പോസ്റ്റി കൊടുത്തു.
അതിലാരോ ആ കുറിപ്പും ചിത്രങ്ങളുമെടുത്തു മറ്റാർക്കോ പോസ്റ്റി.
അതാരാണെന്ന് ഇപ്പോഴും എനിക്കറിയില്ല, പക്ഷേ പോസ്റ്റിയ ചിത്രങ്ങൾ അടുത്ത ദിവസങ്ങളിൽ അനവധി WhatsApp ഗ്രൂപ്പുകളിലും FB പേജുകളിലും ഷെയർ ചെയ്യപ്പെടാൻ തുടങ്ങി. സഞ്ചാരം ഗ്രൂപ്പിൽ നിന്നും, സ്‌കൂൾ, കോളേജ്, ജോലി ചെയ്ത കമ്പനിയുടെ WhatsApp ഗ്രൂപ്പിൽ നിന്നുമൊക്കെ എനിക്ക് തന്നെ ആ ചിത്രങ്ങൾ തിരികെ അയച്ചു കിട്ടാൻ തുടങ്ങിയപ്പോഴാണ് ഇത് എത്രമാത്രം ഷെയർ ചെയ്തു പോയെന്നു മനസ്സിലായത്. എന്തായാലും സന്തോഷമുണ്ട്, കണ്ടവർക്കൊക്കെ അതിഷ്ട്ടപെട്ടല്ലോ, അതുവരെ അധികമാരും കാണാത്തൊരു കാഴ്ച യുടെ വിരുന്നൊരുക്കുവാൻ ആ ക്ലിക്കുകൾക്കു സാധിച്ചല്ലോ.

ഒടുവിൽ, 2018 ജൂലൈ മാസത്തെ 'വനിത' മാഗസിൻ വന്നപ്പോൾ
അതിലും അമ്പത്തി ആറാമത്തെ പേജിൽ, എന്റെ ഭാര്യയും മക്കളും പച്ചക്കറികളുടെ അലങ്കാരത്തിനു കീഴെ ചിരിച്ചു കൊണ്ട് നിൽക്കുന്നു. ഞാനെടുത്ത ചിത്രം മലയാള മനോരമ എന്ന അച്ചടി ഭീമന്റെ വനിത മാഗസിനിൽ എന്റെ അനുവാദമില്ലാതെ അച്ചടിച്ച് വന്നതിൽ എനിക്ക് പരാതിയൊന്നും ഇല്ലെങ്കിലും, ചെയ്യാൻ പാടില്ലാത്തതാണ്.

ഈ ദിവസങ്ങളിൽ ഇതൊക്കെ നടന്നപ്പോഴും, തന്റെ സ്മാർട് ഫോണിലെ സ്‌ക്രീനിൽ ആ ചിത്രങ്ങൾ പരക്കെ ഷെയറി പോകുന്നത് കണ്ടപ്പോൾ വിമൽ ഒരു നെടുവീർപ്പോടെ നഷ്ടബോധത്തോടെ ഓർത്തു;
ഒരല്പം നേരം കൂടി കോതാട് ദ്വീപിൽ ചിലവഴിച്ചിരുന്നുവെങ്കിൽ എന്റെ പടവും കുറെ പേര് കണ്ടേനെ. കല്യാണ പ്രായമായ എത്രയെത്ര പെൺകുട്ടികളുടെ ലൈക്കുകളും കമന്റുകളുമാണ് ഓന് നഷ്ടമായത്.
സാരമില്ല വിമൽ, കല്യാണം കഴിഞ്ഞു നിന്റെ ഹണി മൂൺ ഈ ദ്വീപിലേക്ക്‌ തന്നെ ആവട്ടെ എന്നാശംസിക്കാം.

വല്ലാർപാടം കണ്ടൈനർ റോഡ് വരുന്നതിനു മുൻപ് കോതാട് നാലുപാടും കായലിനാൽ ചുറ്റപ്പെട്ടുകിടന്നൊരു ദ്വീപ് ആയിരുന്നു.
കടത്തു വള്ളവും, ചങ്ങാടവും മാത്രമാണ് പുറം ലോകത്തെത്താൻ ആശ്രയം. എങ്കിലും അവിടുത്തെ നൂറു വർഷം പഴക്കം ചെന്നൊരു സ്‌കൂളും ചവിട്ടു നാടക കേന്ദ്രങ്ങളും കണ്ടാലറിയാം, ഒറ്റപ്പെട്ടൊരു ദ്വീപായിരുന്നുവെങ്കിലും ലോകത്തിന്റെ വെളിച്ചത്തിലേയ്ക്കു തുഴഞ്ഞടുക്കുവാൻ ആഗ്രഹിച്ചിരുന്നൊരു ജനത പണ്ടുമുതലേ ഈ കോതാടിൽ ഉണ്ടായിരുന്നു എന്ന്.

മറക്കാനാവാത്തൊരു അനുഭവത്തിന് അരങ്ങൊരുക്കിയ
നെവിലിനും  കുടുംബത്തിനും ഞങ്ങളുടെ ഇസ്‌തം. ഈ കോതാട് ദ്വീപിലെ പള്ളിയിൽ മാമ്മോദീസ മുക്കുവൻ നിങ്ങൾക്കിനിയും  ഒരുപാട് കുഞ്ഞുങ്ങൾ ജനിക്കട്ടെ...
:)

പാട്ടോളം

പാട്ടിന്റെ ഓളം മനസ്സിലില്ലാത്ത ആരാണീ ഭൂമിയിൽ ഉള്ളത്?
നമുക്കെല്ലാം അത്രമേൽ ഇഷ്ട്ടമാണ് പാട്ടുകൾ.
പാട്ടു കേൾക്കാൻ, പാട്ടു പാടാൻ, പാട്ടിന്റെ ഓളത്തിൽ അലിഞ്ഞില്ലാതാകാൻ...

ഒരു കുഞ്ഞു ജനിക്കുന്നത് മുതൽ കേട്ടുറങ്ങുന്നത് താരാട്ടു പാട്ടുകളാണ്.
പാട്ടിന്റെ ആദ്യ രസം അവിടെ തുടങ്ങുന്നു. പിന്നീട് വളർച്ചയുടെ ഓരോ
കാലത്തും, ഓരോ മൂഡിലും പല പാട്ടുകൾ നമ്മളെ സ്വാധീനിച്ചിട്ടുണ്ട്.
സിനിമകളിലെ പലവിധ ഗാനങ്ങളായിരിക്കും എന്റെ തലമുറക്കാർക്കു
കൂടുതൽ പ്രിയം.
ലളിതവും ശാസ്ത്രീയവും നാടനും വരുത്തനും ഒക്കെയതിലുണ്ട്.

പാട്ടിനെ ശാസ്ത്രീയമായി വിവരിച്ചവതരിപ്പിക്കാൻ ഞാൻ ആളല്ല.
പിന്നെ എന്തിനാണ് ഈ ബ്ലോഗ് എന്നുവച്ചാൽ, ഈയിടെ എന്റെ ഒരു
സുഹൃത്ത് "പാട്ടോളം" എന്നൊരു പരിപാടിയുടെ നോട്ടീസ് അയച്ചു തരികയുണ്ടായി. നമ്മുടെ നാട്ടിൽ നിലകൊണ്ടിരുന്നതും
ഇന്നുള്ളതും ആയ പലതരം പാട്ടുകളുടെ ഒരു അവതരണ
വേദിയായിരുന്നു "പാട്ടോളം".

ഷൊർണൂരിനടുത്തു ഭാരതപ്പുഴയോരത്തു
ഏഴു രാവുകളിൽ അരങ്ങേറിയ നാട്ടുപാട്ടുകളുടെ ഈ ഉത്സവം,
കേരളത്തിലെ എണ്ണമറ്റ പാട്ടു വിഭാഗങ്ങളുടെ സംഗമവേദിയായി.
ഞെരളത്ത് കലാശ്രമം ആണ് ഈ പരിപാടി ഒരുക്കിയത്.

ഇത്രയേറെ പാട്ടു രീതികൾ നമ്മുടെ നാട്ടിൽ നിലനിൽക്കുന്നുണ്ട്
എന്നതൊരു കൗതുകകരമായ അറിവായിരുന്നു.
നമുക്കറിയാമല്ലേ വിവിധ തരം പാട്ടുകൾ;
ഓണപ്പാട്ട്, മാപ്പിളപ്പാട്ട്, വഞ്ചിപ്പാട്ട്, അങ്ങനെയങ്ങനെ...
എന്നാൽ പാട്ടോളം പരിപാടിയിൽ അരങ്ങേറിയ പാട്ടുകളുടെ
നിര കണ്ടാൽ ഒരുപക്ഷെ എന്നെപ്പോലെ നിങ്ങളും അതിശയിച്ചു
പോകും. ദാ പിടിച്ചോ, കുന്നോളം പാട്ടുകൾ...

• കോതാമൂരിപ്പാട്ട്  
• പൂരപ്പാട്ട് 
• ചിന്തു പാട്ട് 
• മറുത്തുകളി പാട്ട് 
• മുണ്ടിയെൻ പാട്ട് 
• തുയിലുണർത്തു പാട്ട് 
• പൂപ്പടയാട്ടം 
• പാനപ്പാട്ട് 
• അയ്യപ്പൻ പാട്ട് 
• വട്ടപ്പാട്ട്
• അറബനമുട്ട്
• കുത്തിയോട്ട പാട്ട് 
• കണ്യാർകളി പാട്ട്
• മാലപ്പാട്ട് 
• കരടികളി പാട്ട് 
• വേടൻ പാട്ട്    
• കെന്ത്രോൻ പാട്ട് 
• വയനാടൻ പാട്ട് 
• തിരുവാതിര ചോഴി 
• വേലൻ പറകൊട്ടു പാട്ട് 
• തോറ്റം പാട്ട് 
• ചവിട്ടു നാടകം 
• മുടിയാട്ട് തോറ്റം 
• മന്ത്രോം പാട്ട് 
• പരിചമുട്ടു കളി പാട്ട് 
• നന്തുണി പാട്ട് 
• മംഗലംകളി പാട്ട്
• ചിമ്മാനക്കളി പാട്ട് 
• എരുത് കാളി പാട്ട് 
• കഥകളി പാട്ട് 
• വടക്കൻ പാട്ട് 
• നാട്ടിപ്പാട്ട്
• സോപാന സംഗീതം 
• വെലിക്കളപ്പാട്ട്
• കണ്ണേറു പാട്ട് 
• ദഫ്മുട്ട് 
• തിറയാട്ടപ്പാട്ട് 
• മരംകൊട്ടു പാട്ട് 
• പൊറാട്ടുകളിപ്പാട്ട് 
• കുമ്മിപ്പാട്ട് 
• തോൽപ്പാവകൂത്തിലെ ആടൽ പാട്ട്
• പുള്ളുവൻ പാട്ട് 
• പാണർ പാട്ട് 
• മാവിലർ പാട്ട് 
• തുമ്പിതുള്ളൽ പാട്ട്
• നായാടിക്കളിപ്പാട്ട്
• ചോഴിക്കളിപ്പാട്ട്
• ഒപ്പനക്കളിപ്പാട്ട്
• മുടിയാട്ടപ്പാട്ട്
• കിണ്ണംകളിപ്പാട്ട്
• കൈകൊട്ടിക്കളിപ്പാട്ട്
• മുടിയേറ്റു പാട്ട്       
• കളം പാട്ട്  
• ...

പിന്നെ ബാവുൽ സംഗീതം !

അവസാന ദിവസം ബംഗാളി ഗായകൻ തരുൺദാസ് ബാവുലും സംഘവും 

അവതരിപ്പിച്ച ബാവുൽ സംഗീതത്തോടെ പാട്ടോളം സമാപിച്ചു.
ബാവുൽ സംഗീതശാഖയെ പരിചയപ്പെടാൻ താല്പര്യമുള്ളവർക്ക് 
ഇവിടെ ക്ലിക്കി, പണ്ട് ചിന്തയിൽ എഴുതിയ ഒരു പോസ്റ്റ് വായിക്കാം.

പാട്ടോളം എന്ന പരിപാടി കൊള്ളാം ല്ലേ !!!
ഇത്രയേറെ നാട്ടുപാട്ടുകൾ, പ്രാദേശികമായും അല്ലാതെയും
നമ്മുടെ ഈ കൊച്ചു കേരളത്തിൽ നിലനിൽക്കുന്നുണ്ട് എന്നത്
പുതിയൊരറിവല്ലേ?
ഒരു സിൽമാ പാട്ടിൽ നാം കേട്ട വരിയോർമ്മയില്ലേ,
കോതാമൂരി പാട്ടുംപാടി വായോ ഈ വഴി...
ഏതാ ആ സിൽമാ ? എന്തായാലും പാട്ടോളം പരിപാടി
കണ്ടവർക്ക് കോതാമൂരി പാട്ടു മനസ്സിലായിട്ടുണ്ടാവും.

മുകളിൽ ചേർത്തിട്ടില്ലാത്ത ഇനിയുമേറെ പാട്ടുകൾ നമ്മുടെ
നാട്ടിലുണ്ട്, അവ നമുക്കും കണ്ടെത്താൻ ശ്രമിക്കാം.
വരും തലമുറയ്ക്ക് അറിയുവാനും പാർന്നു നൽകുവാനും
ഇത്തരം ഉദ്യമങ്ങൾ ഉണ്ടാവുക തന്നെ വേണം.
കാരണം കേരള കലാമണ്ഡലത്തിൽ പോലും നമ്മുടെ നാടിന്റെ
ആവിഷ്കാരങ്ങളായ ഇത്തരം പാട്ടുരൂപങ്ങളെ പഠിപ്പിക്കുകയോ
നിലനിർത്തുകയോ ചെയ്യുന്നില്ല എന്നാണ് അറിഞ്ഞത്.

പലയിടത്തും സവർണ്ണന്റെയും ക്ഷേത്രകലകളുടെയും മാത്രം
പരിപോഷണം നടക്കുന്ന ഇക്കാലത്ത് (എക്കാലത്തും),
ഈ പാട്ടുരൂപങ്ങൾ അന്യം നിന്നു പോകാതെയിരിക്കാൻ
നമുക്കും മനസ്സുകൊണ്ട് പാട്ടോളങ്ങളുടെ കൂടെ നിൽക്കാം.
കാരണം അവ ഒരു കാലത്തിന്റെ ആത്മാവിഷ്ക്കാരങ്ങളായിരുന്നു.
ഒരു ജനതയുടെ നോവും സ്വപ്നങ്ങളും നാട്ടുരീതികളും മിത്തും
വിശ്വാസവും കരുത്തും... എല്ലാം പേറുന്നൊരീ പാട്ടുകൾ
കാലത്തിന്റെ പുഴയിൽ ഒഴുകിത്തേഞ്ഞു പഴക്കം വന്ന
മലയാളപ്പാട്ടിന്റെ അടയാളങ്ങളാണ്.
അവ അനസ്യൂതം നമ്മുടെയും സിരകളിലൂടെ പുഴപോലെ ഒഴുകട്ടെ...