December 25, 2012

ടൈപ്പ് റൈറ്റര്‍


കമ്പ്യൂട്ടര്‍ യുഗത്തിന് മുന്‍പ് വരെ പുറത്തിറങ്ങിയ ഗാഡ്ജറ്റുകളില്‍ വച്ച്
ഏറ്റവും ഹോട്ടസ്റ്റ്  ഐറ്റം ആയിരുന്നു ടൈപ്പ് റൈറ്റര്‍.
ടൈപ്പിംഗ്‌ ജോലികള്‍ക്കായി മുഴുവനായും മെകാനിക്കല്‍ ആയി പ്രവര്‍ത്തിക്കുന്ന
ഒരുപകരണം. ഡോക്കുമെന്റുകളും കത്തുകളും ടൈപ്പ് ചെയ്യുന്നതിനും മറ്റു ഓഫീസ്
ആവശ്യങ്ങള്‍ക്കും പണ്ട് ഒരേയൊരു സാധ്യത യായിരുന്നു ടൈപ്പ് റയിറ്ററുകള്‍.



കാര്യം ഇന്നത്തെ കാലത്ത് ടൈപ്പ് റൈറ്റര്‍ നാമാവശേഷമായെങ്കിലും
പുതു യുഗത്തിലെ ഗാഡ്‌ജെറ്റായ ടാബ്ലെറ്റ് പീ സിയില്‍ പോലും കീ പാടിന്റെ
രൂപ കല്‍പ്പന പൂര്‍ണ്ണമായും പഴയ ആ ടൈപ്പ് റയിറ്റരിന്റെ മാതൃക തന്നെയാണ് !
അതില്‍ അക്ഷരങ്ങള്‍ ഒരുക്കി വച്ചിരിക്കുന്ന രീതിക്ക് ഇനിയൊരിക്കലും
മാറ്റമുണ്ടാവാന്‍ സാധ്യതയില്ല എന്ന് തോന്നുന്നു. ടൈപ്പ് ചെയ്യുവാന്‍ അത്രയേറെ
എളുപ്പത്തിലുള്ള രീതിയിലാണ് QWERTY കീസ് ഒരുക്കിയിട്ടുള്ളത്.

 
 

പറഞ്ഞു കേട്ടിട്ടുണ്ട്, പണ്ടൊക്കെ പത്താം തരം കഴിഞ്ഞാല്‍ പിന്നെ എല്ലാവരും
ടൈപ്പ് റൈറ്റര്‍ ലോവര്‍ ക്ലാസ്സിന് ചേരും. പിന്നീട് ടൈപ്പിംഗ്‌ ഹയ്യര്‍ കൂടി
പാസ് ആയാല്‍ ജോലി റെഡി.
ഈ ബ്ലോഗ്‌ വായിക്കുന്ന മുതിര്‍ന്നവര്‍ക്ക് ഒരുപക്ഷേ ഓര്‍ത്തെടുക്കാനായേക്കും
പണ്ട് നിങ്ങള്‍ പഠിച്ച ടൈപ്പിംഗ്‌ ക്ലാസ്സിലെ ആദ്യ പാഠങ്ങള്‍.


ASDFG.... എന്നൊക്കെ വിരല്‍തുമ്പ് വേദനിക്കും വിധം പഴയൊരു ടൈപ്പ് റയിട്ടറില്‍
കുത്തിപ്പിടിച്ച് അടിച്ചു പഠിച്ച ആദ്യ നാളുകള്‍. പുറത്തെ വഴിയില്‍ നിന്നു തന്നെ
കേള്‍ക്കാം, ടൈപ്പിംഗ്‌ ക്ലാസ്സിലെ താളം പിടിത്തം. അന്നത്തെ പല നിശ്ശബ്ദ
പ്രണയങ്ങള്‍ക്കും താളം മുറുകിയിരുന്നത്‌ ടൈപ്പിംഗ്‌ ഇന്‍സ്ടിറ്റൂട്ടില്‍ ആയിരുന്നു.
കാലാന്തരത്തില്‍ ഇവന്‍ കമ്പ്യൂട്ടറുകള്‍ക്ക് വഴി മാറിയപ്പോള്‍, ടൈപ്പിംഗ്‌ മാസ്റ്ററും
ടൈപ്പ് റയിറ്ററുകളും തനിച്ചായി... ഓര്‍മ്മകളുടെ നെടുവീര്‍പ്പുകളുമായി ഇന്നവ
പലയിടങ്ങളിലും ആക്രി സാധനങ്ങളുടെ കൂട്ടത്തില്‍ പൊടി പിടിച്ചു കിടക്കുന്നു...



കുറച്ചു നാള്‍ മുന്‍പ് പഴയ സാധനങ്ങള്‍ സൂക്ഷിച്ചു വച്ചിരുന്ന അലമാര
തുറന്നപ്പോഴാണ്, അച്ഛന്‍ പണ്ട് ഉപയോഗിച്ചിരുന്ന ഒരു ടൈപ്പ് റൈറ്റര്‍ കയ്യില്‍
പെട്ടത്. പണ്ടെപ്പോഴോ സ്കൂളില്‍ പഠിക്കുന്ന ഒരവധിക്കാലത്ത് ഞാന്‍ ഇവനുമായി
ഒന്നിണങ്ങാന്‍ ശ്രമിച്ചിരുന്നു. അവധിക്കാലം കഴിഞ്ഞപ്പോള്‍ ഞാന്‍ പിന്നെ ഇവനെ
കണ്ടിട്ടേ ഇല്ല. എന്തായാലും ഒരു "പുരാവസ്തു" കയ്യില്‍ കിട്ടിയതല്ലേ, പെട്ടി തുറന്ന്
ഇവനെയൊന്ന് ഗൌനിചേക്കാം എന്ന് തീരുമാനിച്ചു.

 


പഴയതാണെങ്കിലും ഇവന്റെ ലുക്ക്‌ കണ്ടാലറിയാം തറവാടിയാണെന്ന്, അതെ
Olivetti Lettera 25 എന്ന് റയിറ്ററിന്റെ മുകളില്‍ എഴുതി വച്ചിട്ടുണ്ട്.
ഒരു പക്ഷെ അന്നിത് വാങ്ങിയപ്പോള്‍ ഇന്നത്തെ iPhone ന്റെ ഗമയൊക്കെ
ഉണ്ടായിരുന്നിരിക്കാം. എന്തായാലും ഇവനൊരു പുലിക്കുട്ടി തന്നെ, കാലപ്പഴക്കം
ഉണ്ടെങ്കിലും ഒരു കുഴപ്പവുമില്ലാതെ പ്രവര്‍ത്തിക്കുന്നുണ്ട് !



കമ്പ്യൂട്ടറിന്റെ കീ ബോര്‍ഡിലുള്ള പല സൌകര്യങ്ങളും ആ ടൈപ്പ്റയിറ്ററില്‍ ഉണ്ട്.
എല്ലാം മെക്കാനിക്കല്‍ പാര്‍ട്ടുകള്‍ ആണെന്ന് മാത്രം. കമ്പ്യൂട്ടറില്‍ ടൈപ്പ് ചെയ്ത് പ്രിന്റ്‌
എടുക്കും പോലെ അത്രമേല്‍ എളുപ്പമല്ല ഇതില്‍. പക്ഷേ ഒരു കാര്യം, കറന്റ്‌
ഒന്നും വേണ്ട ഇവന് പ്രവര്‍ത്തിക്കാന്‍; ചിലവേതുമില്ല !
റിബ്ബണില്‍ മഷിയും ഒരു വെള്ള കടലാസും ഉണ്ടെങ്കില്‍ സംഗതി റെഡി.





 

അക്ഷരത്തിന്റെ അച്ചുകളെല്ലാം ഏതോ കമ്പിമേല്‍, നാലോ അഞ്ചോ തട്ടുകളിലായി
നിരത്തി വച്ചിരിക്കയാണ്, ക്രിക്കറ്റ്‌ കളി കാണാന്‍ ആളുകള്‍ ഗ്യാലറിയില്‍
ഇരിക്കും പോലെ. ടൈപ്പ് ചെയ്യുമ്പോള്‍, ഉദ്ദേശിച്ച അക്ഷരത്തിന്റെ അച്ച്
താഴെ നിന്നും പൊങ്ങി വന്ന് മുകളില്‍ തിരുകി വച്ചിരിക്കുന്ന പേപ്പറില്‍
റിബ്ബണിന്റെ മേല്‍ പതിച്ച്, അക്ഷരങ്ങള്‍ പതിയുന്നു. ടൈപ്പ് ചെയ്യുമ്പോള്‍
തെറ്റിപ്പോയാല്‍ തിരുത്താന്‍ അത്ര എളുപ്പമല്ല; അതിനു പ്രത്യേകം ഇറേസര്‍
പേപ്പര്‍ ഉണ്ട്.

 
 


കാര്യം ഇന്നിത് ഉപയോഗിക്കാന്‍ അത്ര എളുപ്പമല്ല എങ്കിലും, ചുമ്മാ
ഒന്ന് പരീക്ഷിച്ചു നോക്കാന്‍ രസമാണ്, പണ്ടത്തെ കാള വണ്ടി ഓടിക്കും പോലെ.

December 19, 2012

ട്രെയിന്‍ റഡാര്‍

ട്രെയിന്‍ റഡാര്‍


ഈയിടെ Indian Railway യുടെ National Train Enquiry System(NTES) എന്ന
വെബ് സൈറ്റ് കാണാനിടയായി. ട്രെയിന്‍ യാത്ര നടത്തുന്ന ഏതൊരാള്‍ക്കും വളരെ
ഉപകാരപ്രദമായ രീതിയിലാണ് ഈ വെബ്സൈറ്റ് നമ്മുടെ മുന്‍പില്‍ എത്തിച്ചിരിക്കുന്നത്.
വളരെ ലളിതവും മികച്ചതുമായി എനിക്ക് തോന്നി.


ട്രെയിന്‍ നമ്പര്‍ കൊടുത്താല്‍, ഇപ്പോള്‍ ആ ട്രെയിന്‍ ഏതു സ്റ്റെഷനില്‍ എത്തി,
ഓണ്‍ ടൈം ആണോ, അടുത്ത സ്റ്റെഷനില്‍ എത്തിച്ചേരുന്ന നിശ്ചിത സമയം...
അങ്ങനെ എന്തൊക്കെ അറിയണോ അതെല്ലാം ഈ സൈറ്റ് നല്‍കുന്നു.

http://trainenquiry.com/


ഒരു സ്റ്റെഷന്‍ കോഡ് കൊടുത്താല്‍, അടുത്ത 2 മണിക്കൂര്‍ അല്ലെങ്കില്‍ 4 മണിക്കൂറില്‍
ഏതൊക്കെ ട്രെയിനുകള്‍ കടന്നു പോകുന്നു, ഓരോ ട്രെയിനിന്റെയും വിശദ
വിവരങ്ങള്‍.... എല്ലാം ഞൊടിയിടയില്‍ ലഭ്യം !


ഒരു സ്റ്റെഷനില്‍ പോയി അവിടുത്തെ ടച് സ്ക്രീനില്‍ നമ്മള്‍ പലപ്പോഴും വിവരങ്ങള്‍
അറിയാറുണ്ട് അല്ലെ? അല്ലെങ്കില്‍ ഇന്‍ഫോര്‍മേഷന്‍ കൗണ്ടറില്‍ പോയി
കാര്യങ്ങള്‍ തിരക്കും... അതിനെക്കാളും എത്രയോ കൂടുതല്‍ കാര്യങ്ങള്‍ നമുക്ക്
വീട്ടിലിരുന്ന് ലൈവ് ആയി ഈ സൈറ്റ് മുഖേന ലഭിക്കുന്നു !


ഇനി മറ്റൊരു കിടിലന്‍ കാര്യം കൂടിയുണ്ട് ഈ സൈറ്റില്‍, "ട്രെയിന്‍ റഡാര്‍"
എവിടെ ക്ലിക്കിയാല്‍ ഈ സൈറ്റില്‍ നിന്നും ഒരു മാപ്പിലേക്ക് നാം ചേക്കേറുന്നു.

http://railradar.trainenquiry.com/


ഭാരതത്തില്‍ ഓടുന്ന എല്ലാ ട്രെയിനുകളും ഇവിടെ ഈ മാപ്പില്‍ രേഖപ്പെടുത്തിയിട്ടുണ്ട് .
അവ ഓടുന്ന റൂട്ടും ദൂരങ്ങളും എല്ലാം വളരെ വ്യക്തമായി ഇതിലൂടെ അറിയാം.
ട്രാക്കിലൂടെ ഒന്നിനു പുറകെ ഒന്നായി ചീറിപ്പായുന്ന ട്രെയിനുകളുടെ ഇത്തരത്തിലുള്ള
ഒരു ഓണ്‍ലൈന്‍ മാപ്പിങ്ങ് ഒരുപക്ഷെ നാം ആദ്യമായി കാണുകയായിരിക്കും.
ക്ലിക്കുന്ന ഓരോയിടത്തും എണ്ണമറ്റ വിവരങ്ങള്‍ തന്നു കൊണ്ടിരിക്കും...


ഇന്നേ ദിവസം റദ്ദു ചെയ്യപ്പെട്ട ട്രെയിനുകള്‍, റൂട്ട് മാറി ഓടുന്ന ട്രെയിനുകള്‍,
സ്പെഷ്യല്‍ ട്രെയിനുകള്‍... അങ്ങനെയുള്ള വിവരങ്ങളും ഈ സൈറ്റില്‍ ഉണ്ട്.

ഈ സേവനം കിട്ടുന്ന; സ്മാര്‍ട്ട്‌ ഫോണുകളില്‍ ഇന്‍സ്റ്റോള്‍ ചെയ്യാവുന്ന
മൊബൈല്‍ ആപ്ലിക്കെഷനും ഈ സൈറ്റില്‍ നിന്നും ലഭിക്കും.

ഇനിയൊരു ട്രെയിന്‍ യാത്ര പോകുമ്പോള്‍, നിങ്ങളും ഈ വെബ്‌സൈറ്റ് ഉപയോഗിച്ച്
കാര്യങ്ങള്‍ മുന്‍കൂട്ടി അറിയുമല്ലോ. ഒരുപക്ഷെ നമ്മുടെ വിലയേറിയ സമയം ലാഭിക്കാന്‍
കഴിഞ്ഞേക്കും, യാത്രയുടെ വ്യക്തമായ ഒരു ധാരണയും നമുക്ക് ലഭിചേക്കും...